ԹԵԺ ԳԻԾ
28.07.2017
Ռուսաստանի հանդեպ ամերիկյան նոր պատժամիջոցների ազդեցությունը Հայաստանի վրա էական չի լինի․ Ֆիննախարար

Տեսանյութի աղբյուրը՝ www.azatutyun.am

Հայաստանի կառավարությունում հնարավոր են համարում, որ Ռուսաստանի նկատմամբ ԱՄՆ նոր պատժամիջոցները կարող են բացասական ազդեցություն ունենալ Հայաստանի տնտեսության վրա: Ֆինանսների նախարար Վարդան Արամյանի ընդգծմամբ, սակայն, այն էական չի կարող լինել

«Ես չեմ կարծում, որ նոր պատժամիջոցներն էական ցնցումներ կառաջացնեն Ռուսաստանի տնտեսության համար, ինչը բումերանգի էֆեկտով կարող էր անդրադառնալ Հայաստանի վրա՝ տրանսֆերտների առումով, մեր արտահանման պահանջարկի առումով և այլն: Չեմ կարծում, որ այդ ուղղություններով մենք կունենանք էական ցնմցումներ: Ինչու՞, որովհետև Ռուսաստանի տնտեսությունն արդեն սովորել է ապրել այդպիսի պատժամիջոցների պայմաններում, և չեմ կարծում, որ լրացուցիչ խորացումը կբերի էական ցնցումների: Բացասական ազդեցությունների՝ հնարավոր է»,- ասաց Արամյանը, մասնավորապես, նշելով արժութային փոխարժեքների հարաբերակցության տատանումները:

 Միացյալ Նահանգների Սենատի կողմից երեկ ընդունված օրինագիծը, որով նախատեսվում է նոր պատժամիջոցներ սահմանել Ռուսաստանի հանդեպ, դեռ պետք է արժանանա նախագահ Թրամփի հավանությանը: Ռուսաստանի ֆիանսական շուկան, մինչդեռ, արդեն արձագանքել է Սենատի որոշմանը․ ռուբլին որոշակիորեն արժեզրկվել է:

2015թ․ ապրիլին Ռուսաստանի դեմ առաջին պատժամիջոցների սահմանումից մոտ մեկ տարի անց նախագահ Վլադիմիր Պուտինը խոստովանեց՝ արևմտյան պատժամիջոցների պատճառով Ռուսաստանը կորցրել է մոտ 160 միլիարդ դոլար: 2014-2016 թթ․ընթացքում ռուսական ռուբլին արժեզրկվեց մոտ երկու անգամ:

2014-ի վերջին մոտ 20 տոկոսով արժեզրկվեց նաև հայկական դրամը: 2015 թվականին էականորեն կրճատվեցին Հայաստանից Ռուսաստան արտահանման ծավալները, կտրուկ անկում ապրեց նաև Ռուսաստանից ստացվող մասնավոր տրանսֆերտների մակարդակը: Ռուսաստանից եկող տրանսֆերտները 2014 -ին կազմել էին 1 միլիարդ 554 միլիոն դոլար, 2015 թ․՝ 1 միլիարդ 8 միլիոն դոլար, իսկ 2016 թվականին այդ ցուցանիշը 896 միլիոն դոլար էր՝ գրեթե 58 տոկոսով պակաս 2014 թվականի համեմատ:

Նյութի աղբյուրը՝ www.azatutyun.am