Եվրոպական բիզնես ասոցիացիայի (EBA) նախաձեռնությամբ Երևանում տեղի է ունեցել Կայուն զարգացման հերթական համաժողովը, որը միավորել է Կառավարության, միջազգային կազմակերպությունների, քաղաքացիական հասարակության, ակադեմիական շրջանակների և մասնավոր հատվածի ներկայացուցիչներին՝ նպատակ ունենալով նպաստել կայուն զարգացման առաջընթացին Հայաստանում և ողջ աշխարհում։
Համաժողովի շրջանակներում միջազգային հեղինակավոր մի շարք փորձագետներ հանդես են եկել ելույթներով և մասնակցել պանելային քննարկումներին՝ ներկայացնելով կայունության ոլորտի համաշխարհային լավագույն փորձը։
Համաժողովի ընթացքում ՀՀ ֆինանսների նախարարության հաշվապահական հաշվառման և աուդիտորական գործունեության կարգավորման, հաշվետվությունների մշտադիտարկման վարչության պետ Կարեն Ալավերդյանը մասնակցել է «Հայաստանի հանձնառությունը ՄԱԿ-ի կայուն զարգացման նպատակներին» խորագրով պանելային քննարկմանը՝ ներկայացնելով ՀՀ-ում կայունության հաշվետվողականության ոլորտներում նախաձեռնված բարեփոխումները, ինչպես նաև խոսելով ոլորտում առկա մարտահրավերների ու անելիքների մասին։
