ՀՀ ֆինանսների նախարարության գլխավոր քարտուղար Կարեն Սարգսյանը մասնակցել է «Հարկ վճարողի օրը» տեղի ունեցած բարեգործության ոլորտի «Ջատագովության խմբի» հանդիպմանը:
Հանդիպմանը ներկա են եղել պետական գերատեսչությունների ներկայացուցիչներ, ինչպես նաև քաղաքացիական հասարակության տարբեր կազմակերպություններ։
Կազմակերպված հանդիպում-քննարկման նպատակն էր համատեղ ջանքերով նպաստել Հայաստանում բարեգործության ոլորտի զարգացմանն ու ոլորտային բարեփոխումների կայացմանը։ Քննարկման ընթացքում մասնակիցների կողմից փորձ է արվել վերլուծել բարեգործության համաշխարհային միտումները, բարեգործության վրա ազդող համընդհանուր գործոնները և այդ գործոնների խթանման ուղղությամբ տարբեր երկրների պետական քաղաքականության ձևերը։
Հանդիպման ժամանակ անդրադարձ է կատարվել Հայաստանում բարեգործության ոլորտի իրավական և օրենսդրական ընթացիկ իրավիճակին, ինչպես նաև պետական կառույցների և ՔՀԿ-ների ներկայացուցիչների կողմից ներկայացվել են դիտարկումներ և առաջարկություններ՝ ի նպաստ քաղաքականության փաստաթղթի մշակմանն ու բարելավմանը: