ՀՀ ֆինանսների նախարարի տեղակալ Էդգար Մկրտչյանը հանդիպել է Արտոնյալ ֆինանսավորման գլոբալ հիմնադրամի (GCFF) ղեկավար կոմիտեի ներկայացուցիչներին։
Նախարարի տեղակալը շնորհակալություն է հայտնել Ղարաբաղից տեղահանման հետևանքով առաջացած մարդասիրական և ինտեգրացիոն խնդիրների արագ լուծման գործում ՀՀ Կառավարությանը ցուցաբերված աջակցության, ինչպես նաև համագործակցության շարունակականության ապահովման համար։
Նախարարի տեղակալը կարևորել է Արտոնյալ ֆինանսավորման գլոբալ հիմնադրամի դերակատարությունը՝ ընդգծելով, որ GCFF-ի միջոցների շնորհիվ Հայաստանը կարողացել է պահպանել ֆինանսական կայունությունը և իրականացնել բարեփոխումներ սոցիալական պաշտպանության և բնակարանային աջակցության ծրագրերի շրջանակներում։
Ֆինանսների նախարարի տեղակալը վերահաստատել է Հայաստանի պատրաստակամությունը՝ շարունակելու սերտ համագործակցությունը միջազգային գործընկերների հետ՝ ուղղված սոցիալական և տնտեսական դիմակայունության ամրապնդմանը և յուրաքանչյուր տեղահանված ընտանիքի համար արժանապատիվ ու ապահով կյանքի պայմանների ստեղծմանը։
