Հուլիսի 7-ից 9-ը Մոսկվայում ՀՀ ֆինանսների նախարարի տեղակալ Էդուարդ Հակոբյանի գլխավորած պատվիրակությունը մասնակցել է Հայաստանի Հանրապետության և Ռուսաստանի Դաշնության ֆինանսների նախարարությունների միջև երկկողմ համագործակցության շրջանակներում քննարկումների ՀՀ ՖՆ մակրոտնտեսական կանխատեսումների համակարգի բարելավման ուղղությամբ։
Այցը կազմակերպվել է ՀՀ և ՌԴ ֆինանսների նախարարությունների միջև 2023-2025թթ. երկկողմ համաձայնագրի 2024թ. միջոցառումների ծրագրով նախատեսված «ՀՀ մակրոտնտեսական և բյուջետային կանխատեսումների համակարգի զարգացում» ուղղության շրջանակներում։ Վերջինիս ընթացքում պատվիրակությունը մասնակցել է հարկային եկամուտների կանխատեսման ուղղությամբ կատարված աշխատանքի ամփոփ արդյունքների, ինչպես նաև տնտեսության իրական հատվածի ցուցանիշների կանխատեսման գործիքակազմի կատարելագործման աշխատանքների քննարկումներին։
Քննարկումների ընթացքում անդրադարձ է կատարվել հետևյալ հարցերին․
- երկկողմ համագործակցության շրջանակներում գործող ծրագրերի ընթացքը,
- «ՀՀ մակրոտնտեսական և բյուջետային կանխատեսումների համակարգի զարգացում» ծրագրի ընթացիկ արդյունքները,
- ՀՀ ֆինանսների նախարարությունում իրական հատվածի կանխատեսումների համար ներկայումս կիրառվող մոդելային համակարգը,
- ՌԴ ՖՆ գիտահետազոտական կենտրոնի կողմից մշակված կիսակառուցվածքային մակրոտնտեսական մոդելը և դրա միջոցով կանխատեսումների իրականացումը,
- հարկաբյուջետային կանխատեսումների և ռիսկերի գնահատման համակարգը ՌԴ ֆինանսների նախարարությունում,
- համագործակցության շրջանակներում նոր գործիքակազմի մշակումը մակրոտնտեսական բնույթի հարկաբյուջետային ռիսկերի գնահատման ուղղությամբ։
