ՀՀ ֆինանսների նախարարության պետական պարտքի կառավարման վարչության պետի պարտականությունները կատարող Մարինե Մելիքյանը և մակրոտնտեսական քաղաքականության վարչության պետ Արշալույս Հարությունյանը հանդիպել են ֆինանսական շուկայի մասնակիցների՝ բանկերի, կենսաթոշակային ֆոնդերի, Հայաստանի ֆոնդային բորսայի, ինչպես նաև ներդրումային և ապահովագրական ընկերությունների և այլ ֆինանսական կազմակերպությունների ներկայացուցիչների հետ:
Հանդիպման ընթացքում Մարինե Մելիքյանը մասնակիցներին է ներկայացրել 2026թ. փոխառությունների տարեկան ծրագիրը: Մասնավորապես, ներկայացվել են 2026թ. հարկաբյուջետային շրջանակը, համախառն ֆինանսական կարիքն ու պետական բյուջեի պակասուրդի ֆինանսավորման աղբյուրները, պետական բյուջեի պակասուրդի ֆինանսավորման պարտքային գործիքակազմը, պարտքի կառավարման ուղենշային ցուցանիշները, ինչպես նաև պետական գանձապետական պարտատոմսերի տեղաբաշխման աճուրդների օրացույցը:
Արշալույս Հարությունյանը ներկայացրել է ընթացիկ մակրոտնտեսական զարգացումները և կանխատեսումները: ՀՀ ֆինանսների նախարարության ներկայացուցիչները պատասխանել են քննարկման շրջանակներում մասնակիցների կողմից բարձրացված հարցերին:
