Այսօր ՀՀ կառավարությունը հավանության է արժանացրել «Հայաստանի Հանրապետության 2026-2028 թվականների պետական միջնաժամկետ ծախսային ծրագիրը հաստատելու մասին» որոշման նախագիծը:
Ծրագիրը ներկայացնում է ՀՀ կառավարության տնտեսական և հարկաբյուջետային, այդ թվում՝ պարտքային և ծախսային քաղաքականությունների հիմնական ուղղությունները միջնաժամկետ հատվածում: Այն, մասնավորապես, սահմանում է, որ ՀՀ տնտեսական աճի ընդլայնումը մեծապես պայմանավորված է լինելու միջազգային մրցունակության աճով։ Իսկ միջազգային մրցունակության աճն ապահովելու նպատակով ՀՀ կառավարությունը նպատակադրել է զարգացնել այնպիսի տնտեսություն, որը մի կողմից աշխարհին կառաջարկի տեխնոլոգիական և նորարարական արտադրանք, իսկ մյուս կողմից իր ենթակառուցվածքներով կնպաստի տարածաշրջանի կարողությունների բարձրացմանը։
Այս տեսանկյունից ՀՀ կառավարությունը գիտելիքն ու նորարարությունը հռչակել է որպես տնտեսական զարգացման հիմնական շարժիչ ուժ:
