ՀՀ Ազգային ժողովն այսօր երկրորդ ընթերցմամբ և ամբողջությամբ 89 «կողմ» ձայներով ընդունել է «ՀՀ 2020 թ. պետական բյուջեի մասին» օրենքում փոփոխություններ և լրացում կատարելու մասին» օրինագիծը:
Այսպիսով, ռազմական գործողություններով պայմանավորված Հայաստանի պետական բյուջեով ընթացիկ ծախսերը կավելացվեն 40 մլրդ դրամով:
«Մենք համոզված ենք, որ այս փոփոխությունները հնարավորություն կտան համարժեքորեն արձագանքել այն խնդիրներին, որոնց մենք ստիպված ենք եղել առերեսվել այս ընթացքում։ Նման տեսքով նախագծի հաստատումը մեզ հնարավորություն կտա լուծել ծագած խնդիրները»,- իր խոսքում հայտարարել է ֆինանսների նախարար Ատոմ Ջանջուղազյանը։
Նշենք, որ «Ռազմական դրության իրավական ռեժիմի մասին» օրենքի համաձայն՝ Կառավարությունը ռազմական դրություն հայտարարվելուց հետո՝ ոչ ուշ, քան 10-օրյա ժամկետում, ՀՀ Ազգային ժողով է ներկայացնում ընթացիկ տարվա պետական բյուջեում փոփոխություններ և լրացումներ կատարելու մասին օրենքի նախագիծ: