Ապրիլի 10-ին ՀՀ ֆինանսների նախարարությունում տեղի է ունեցել սեմինար «Կառավարման մարմինների գործառույթները խոշոր աղետների ժամանակ» թեմայով: Սեմինարն անցկացրել են ՀՀ արտակարգ իրավիճակների նախարարության համապատասխան մասնագետները` ՀՀ ԱԻՆ ՓԾ բնակչության պաշտպանության և աղետների հետևանքների վերացման կազմակերպման վարչության պետ, գնդապետ Արթուր Մուրադյանի գլխավորությամբ:
Սեմինարի նպատակն էր ՀՀ ֆինանսների նախարարության աշխատակիցներին իրազեկել արտակարգ իրավիճակներում պաշտպանության միջոցառումների, արձագանքման պլանավորման, ճիշտ վարքականոնների դրսևորման և, մասնավորապես, ֆինանսների նախարարության` որպես կառավարման մարմնի գործառույթների մասին:
Միջոցառման մասնակիցներին ներկայացվել են նաև ընդհանուր տեղեկություններ Հայաստանին բնորոշ բնածին և տեխնածին վտանգների, դրանց առաջացման նախապայմանների և փուլերի, ազդեցությունների, ինչպես նաև կանխարգելման, ռիսկերի նվազեցման և պաշտպանության վերաբերյալ:
ՀՀ ԱԻՆ մասնագետները մեծ կարևորություն են տվել նախարարության աշխատակազմի` արտակարգ իրավիճակներում վարքականոնների ուսուցմանը և ղեկավար կազմի կողմից հրահանգավորմանը: Այս նպատակով անհրաժեշտ է պարբերաբար կազմակերպել և իրականացնել տարահանման և պատսպարման վարժանքներ, իրականացնել աշխատակիցների սթրեսադիմացկունության և հոգեկան կայունության որակների զարգացման դասընթացներ:
