ՀՀ ֆինանսների նախարար Ատոմ Ջանջուղազյանը մասնակցել է Գերմանիայի միասնության օրվա տոնակատարությանը: Այս տարի Գերմանիայի դեսպանությունը տոնը նշանավորել է պաշտոնական ընդունելությամբ և գերմանացի հայտնի նկարիչ Հերբերտ Մայերի «Ովքեր ենք մենք» խորագրով ցուցահանդեսի բացմամբ, որը Հայաստանի ազգային պատկերասրահում կցուցադրվի մինչև դեկտեմբերի 3-ը:
Ատոմ Ջանջուղազյանը շնորհավորելով Գերմանիայի միասնության օրվա առթիվ, նշել է, որ հայ-գերմանական հարաբերությունները դինամիկ զարգանում են քաղաքական, տնտեսական, միջխորհրդարանական, գիտակրթական, մշակութային և տարածքային կառավարման բնագավառներում:
«Ժողովրդավարական արժեհամակարգով, քաղաքական, տնտեսական և սոցիալական զարգացման աստիճանով Գերմանիան մի շարք երկրների, այդ թվում՝ Հայաստանի համար հանդիսանում է պետականաշինության օրինակելի մոդել և վստահելի գործընկեր», - ասել է նախարարը:
Նախարարն ավելացրել է, որ Հայաստանի անկախության անցած տարիների ընթացքում գերմանացի գործընկերների հետ համատեղ հաջողվել է արդյունավետ համագործակցություն հաստատել փոխադարձ հետաքրքրություն ներկայացնող գրեթե բոլոր ոլորտներում:
Հայաստանում Գերմանիայի Դաշնային Հանրապետության դեսպան Մաթիաս Քիսլերը, խոսելով 28 տարի առաջ կայացած իրադարձության մասին, ասել է, որ այսօրվա Գերմանիան միասնության ու միասնականության առումներով նոր մարտահրավերների առջև է կանգնած: Դեսպանը կարևորել է 2018 թվականի առանձնահատկությունը, որը պայմանավորված էր դաշնային կանցլեր Մերկելի՝ պատմության մեջ առաջին անգամ Հայաստան այցով:
«Մենք ցանկանում ենք հնարավորինս աջակցել նոր կառավարությանը արդիականացման և բարեփոխումների ճանապարհին: Ներկայումս մենք միասին աշխատում ենք այդ աջակցությունը լրացուցիչ նախագծերով և ծրագրերով համալրելու ուղղությամբ: Վերջին 12 ամիսներին շատ բան է արվել մեր երկկողմ հարաբերություններում, հատկապես՝ մշակույթի և կրթության ոլորտում»,-ասել է Մաթիաս Քիսլերը:
