Հայաստանի Հանրապետության կառավարությունը և Վերակառուցման և զարգացման եվրոպական բանկը (ՎԶԵԲ) ստորագրել են փոխըմբռնման հուշագիր՝ 2024 թվականի մայիսի 14-ից 16-ը ՎԶԵԲ տարեկան հանդիպումը և գործարար համաժողովը Երևանում անցկացնելու վերաբերյալ:
Հուշագիրը ստորագրվել է Սամարղանդ քաղաքում (Ուզբեկստանի Հանրապետություն) ՀՀ ֆինանսների նախարար Վահե Հովհաննիսյանի և ՎԶԵԲ գլխավոր քարտուղար Կազուհիկո Կոգուչիի կողմից։
ՎԶԵԲ 33-րդ տարեկան համաժողովի առանցքային իրադարձությունը Բանկի՝ որոշում կայացնող բարձրագույն մարմնի՝ կառավարիչների խորհրդի նիստն է, որի ընթացքում գնահատականներ կտրվեն ՎԶԵԲ-ի կատարած աշխատանքներին և կսահմանվեն հետագա ռազմավարական ուղղությունները:
Համաժողովի ընթացքում նախատեսված է նաև բիզնես ֆորում, որին ներկա կլինեն բիզնեսի ներկայացուցիչներ, ներդրողներ և պետական պաշտոնյաներ, ովքեր կմասնակցեն պանելային քննարկումների և տարբեր ցանցային միջոցառումների:
Փոխըմբռնման հուշագիրը սահմանում է տարեկան ժողովի պլանավորման և իրականացման հետ կապված կողմերի պարտականությունները: Երկու կողմերն էլ իրենց հանձնառությունն են հայտնել միջոցառման հաջող անցկացման վերաբերյալ:
«Մենք ուրախ ենք հյուրընկալել ՎԶԵԲ տարեկան համաժողովը Հայաստանում 2024 թվականին: Այն մեզ հնարավորություն կտա ավելի լայն լսարանի առաջ ներկայացնել մեր երկիրը և ներգրավել մեզ համար կարևոր նշանակություն ունեցող ներդրումներ», - ասել է ՀՀ ֆինանսերի նախարար Վահե Հովահննիսյանը:
ՎԶԵԲ-ը Հայաստանում իր գործունեության սկզբից ի վեր ներդրել է շուրջ 2 միլիարդ եվրո 206 նախագծերում՝ աջակցելով մասնավոր հատվածի զարգացմանը, էներգետիկայի, ենթակառուցվածքների, հեռահաղորդակցության և ֆինանսական ոլորտներին:
