ՀՀ ֆինանսների նախարարությունում այսօր՝ փետրվարի 17-ին տեղի է ունեցել հանրային քննարկում՝ նվիրված ՀՀ պետական բյուջեի կատարման մասին հաշվետվությունների որակի, բովանդակության եւ դրանք առավել հանրամատչելի դարձնելու գործընթացին:
Հանդիպմանը մասնակցել են պետական կառույցների, միջազգային եւ հասարակական կազմակերպությունների ներկայացուցիչներ, ինչպես նաև ֆինանսների նախարարության մի շարք աշխատակիցներ:
Ֆինանսների նախարարի տեղակալ Վահե Հովհաննիսյանը շնորհակալություն է հայտնել ներկաներին ակտիվ ներգրավվածության, ներկայացված առաջարկությունների եւ դիտողությունների համար, ինչպես նաեւ ՀՀ ֆինանսների նախարարության Բյուջեների կատարման հաշվետվությունների վարչությանը՝ տարված աշխատանքի համար:
Հիմնական առաջարկությունների ու դիտողությունների արդյունքում նախատեսվում է վերանայել հաշվետվության մեջ առկա տեղեկատվության ձեւաչափը՝ այն դարձնելով առավել մատչելի եւ մանրամասն, ինչպես նաև կարեւորվել է տեքստերի վիզուալացման անհրաժեշտությունը:
Ներկաները բարձր են գնահատել Ֆինանսների նախարարության նախաձեռնությունը եւ հայտնել իրենց պատրաստակամությունը հետագայում եւս նպաստելու գործընթացի շարունակական բարելավմանը: