ՀՀ վարչապետի` գնումների համակարգը շարունակական բարելավելու հանձնարարականի շրջանակում ՀՀ ֆինանսների նախարարությունը նախաձեռնել է գնումների հետ կապված հարաբերությունները կարգավորող իրավական ակտերում փոփոխությունների կատարման հերթական գործընթացը:
Կարեւորելով պատվիրատուների ներգրավվածությունը հիշյալ գործընթացին՝ անցնող երկու շաբաթների ընթացքում Ֆինանսների նախարարի տեղակալ Ավագ Ավանեսյանի եւ նախարարության Գնումների քաղաքականության վարչության պետ Սերգեյ Շահնազարյանի նախաձեռնությամբ աշխատանքային հանդիպումներ են տեղի ունեցել ՀՀ պետական գերատեսչությունների ներկայացուցիչների հետ:
Հանդիպումների ընթացքում քննարկվել են կառավարության ծրագրով եւ պետական բյուջեով նախատեսված առաջնահերթ ծրագրերի իրականացման համար անհրաժեշտ պայմանագրերի կնքմանը եւ կատարմանը վերաբերող հնարավոր խնդիրներն ու դժվարությունները՝ մեթոդական ապահովման շրջանակում դրանց արձագանքելու եւ ընթացակարգերը սահմանված պայմաններով կազմակերպելու համար:
