Ֆինանսների նախարար Տիգրան Խաչատրյանն այսօր հյուրընկալել է Հայաստանի պետական տնտեսագիտական համալսարանի (ՀՊՏՀ) Գյումրու մասնաճյուղի ուսանողներին:
Ուսանողները շրջայց են կատարել ՀՀ ֆինանսների նախարարության շենքում, ծանոթացել են նախարարության գործունեությանը, լիազորությունների շրջանակին, աշխատանքի սկզբունքներին եւ ուղղություններին:
Նախարար Խաչատրյանն ապագա տնտեսագետներին է ներկայացրել բյուջեի եկամուտների ձեւավորման եւ միջոցների բաշխման հիմնական ուղիներն ու սկզբունքները, խոսել նախարարության հիմնական գործառույթներից, ինչպես նաեւ պատասխանել է ուսանողների հարցերին:
Հանդիպմանը ներկա են եղել նաեւ նախարարության կառուցվածքային ստորաբաժանումների ղեկավարներ, ովքեր խոսել են հարկաբյուջետային քաղաքականության մշակման, պետական բյուջեի պլանավորման, մակրոտնտեսական կանխատեսումների իրականացման թեմաների շուրջ:
Ֆինանսների նախարարության գործունեության վերաբերյալ ուսանողների իրազեկվածության մակարդակի բարձրացմանն ուղղված միջոցառումներն այսուհետ կրելու են շարունակական բնույթ:
