Հուլիսի 6-ին ՀՀ ֆինանսների նախարար Ատոմ Ջանջուղազյանն ընդունել է Հայաստանի Հանրապետությունում Ամերիկայի Միացյալ Նահանգների արտակարգ և լիազոր դեսպան Ռիչարդ Միլսին:
Հանդիպման ընթացքում կողմերն անդրադարձել են երկրի բարեփոխումների օրակարգին, հարկային և կենսաթոշակային ոլորտներում իրականացվող փոփոխություններին, ներդրումային միջավայրին, ինչպես նաև հարկաբյուջետային շրջանակին, պետական ֆինանսների կառավարմանն առնչվող հարցերի:
Ատոմ Ջանջուղազյանը նշել է, որ հարկաբյուջետային իրավիճակը բավականին կայուն է. «Նախորդ տարիներին մեզ հաջողվել է ստեղծել մի համակարգ, որը կախված է ոչ թե անհատներից, այլ ինստիտուտներից և գործընթացներից: Այս տեսանկյունից կարևոր է նաև թվայնացումը, ինչը մշտապես մեր օրակարգում է»: Նախարար Ջանջուղազյանը բարձր է գնահատել համագործակցությունը Միացյալ Նահանգների հետ և կարևորել վերջինիս ընդլայնման հեռանկարները:
Դեսպան Միլսն իր հերթին նշել է. «Ֆինանսական քաղաքականությունը վճռորոշ է կայուն տնտեսական աճի և ամուր սոցիալական քաղաքականության հարցում: Միացյալ Նահանգների կառավարությունը երկար տարիներ աշխատել է Ձեր նախարարության հետ ֆինանսական բարեփոխումների շուրջ, և ես լիահույս եմ, որ մեր համագործակցությունը կշարունակվի, և մենք կգտնենք ուղիներ նոր կառավարության առջև դրված գերակա ուղղություններին աջակցելու համար»:
