ՀՀ վարչապետի հանձնարարությամբ՝ ՀՀ ֆինանսների նախարարությունում տեղի է ունեցել հանդիպում ՀՀ մշակույթի նախարարությանը ենթակա մի քանի ՊՈԱԿ-ների ներկայացուցիչների հետ: Հանդիպմանը մասնակցել են ֆինանսների նախարար Ատոմ Ջանջուղազյանը, մշակույթի նախարար Լիլիթ Մակունցը, ֆինանսների նախարարի առաջին տեղակալ Կարեն Բրուտյանը և ոլորտի այլ պատասխանատուներ:
Հանդիպման ընթացքում քննարկվել է «Բյուջեների կատարման կարգը հաստատելու և Հայաստանի Հանրապետության կառավարության մի շարք որոշումներն ուժը կորցրած ճանաչելու մասին» ՀՀ կառավարության որոշումը: Համաձայն որոշման` պետական ոչ առևտրային կազմակերպությունների (ՊՈԱԿ) ենթահաշիվների վճարումները պետք է իրականացվեն գանձապետական միասնական հաշվից։
Ոլորտի մասնագետները ներկայացրել են փոփոխության նպատակը և գանձապետարանի կողմից սպասարկման կարգը, ընդգծել դրա առավելությունները: ՊՈԱԿ-ների մտահոգությունների հետ կապված տրվել են պարզաբանումներ և ներկայացվել են առաջարկվող կարգավորումները:
