Հոկտեմբերի 2-ին ՀՀ ֆինանսների նախարար Ատոմ Ջանջուղազյանն ընդունել է Ասիական զարգացման բանկի ներկայացուցիչներին։ Հանդիպման ընթացքում ԱԶԲ հայաստանյան գրասենյակի արդեն նախկին տնօրեն Շեյն Ռոզենթալը ներկայացրել է գրասենյակի նորանշանակ ղեկավար Պաոլո Սպանտիգատիին։
Նախարարը շնորհակալություն է հայտնել Շեյն Ռոզենթալին՝ իր պաշտոնավարման ընթացքում ՀՀ և ԱԶԲ միջև արդյունավետ համագործակցության զարգացման գործում ներդրված ջանքերի համար։ Միաժամանակ, նախարարը նշել է, որ 2017 թվականի հունվարի 1-ից ավարտվել է Ասիական զարգացման հիմնադրամից արտոնյալ պայմաններով վարկային միջոցների տրամադրումը Հայաստանի Հանրապետությանը՝ հաշվի առնելով այն հանգամանքը, որ Հայաստանի՝ մեկ շնչին ընկնող համախառն ազգային եկամուտը 2010-2014թթ. գերազանցել է ԱԶԲ-ի կողմից սահմանված շեմը, և հավելել, որ ՀՀ կառավարությունը շարունակական քաղաքականություն է իրականացնում՝ Հայաստանի Հանրապետության՝ բարձր եկամուտ ունեցող երկրների շարքում ընդգրկվելու ուղղությամբ։
Ա․ Ջանջուղազյանը նաև նշել է, որ ներկայումս ՀՀ հանդեպ առկա է միջազգային հանրության վերաբերմունքի դրական փոփոխություն՝ պայմանավորված ՀՀ կառավարության ընթացիկ բարեփոխումներով։
ԱԶԲ ներկայացուցիչները շնորհավորել են հայկական կողմին եվրապարտատոմսերի հաջող թողարկման կապակցությամբ: Հանդիպման ավարտին ԱԶԲ գործընկերները վստահություն են հայտնել, որ պրն․ Սպանտիգատիի նշանակումը ԱԶԲ հայաստանյան գրասենյակի ղեկավարի պաշտոնում դրականորեն կազդի ՀՀ և ԱԶԲ համագործակցության արդյունավետության և հետագա շարունակականության և ընդլայնման վրա։