ՀՀ ֆինանսների նախարար Վահե Հովհաննիսյանը ՀՀ նախագահ Վահագն Խաչատուրյանի գլխավորած պատվիրակության կազմում մասնակցել է Աբու Դաբիում ընթացող «Գլոբալ ներդրումների ապագայի քարտեզագրում. գլոբալ ներդրումային լանդշաֆտի նոր ալիքը, դեպի նոր հավասարակշռված համաշխարհային կառուցվածք» խորագրով 14-րդ համաշխարհային տարեկան ներդրումային համաժողովին:
Համաշխարհային ներդրումների ոլորտում կարևորագույն իրադարձություն համարվող այս համաժողովի շրջանակներում ՀՀ ֆինանսների նախարար Վահե Հովհաննիսյանը Հայաստանի ֆոնդային բորսայի գլխավոր տնօրեն Հայկ Եգանյանի հետ հանդիպել է Աբու Դաբիի ֆոնդային բորսայի խմբի գլխավոր գործադիր տնօրեն Աբդուլա Սալեմ Ալնուայմինին։ Հանդիպման ընթացքում քննարկվել են երկկողմ համագործակցության հնարավորությունները, այդ թվում՝ ֆինանսական շուկաների ընդլայնմանն ու նոր ներդրումների խթանմանն առնչվող հարցեր:
Նախարար Հովհաննիսյանը ներկայացրել է ընթացիկ տնտեսական բարեփոխումները և երկրի ֆինանսական համակարգի զարգացման առաջնահերթությունները։ Աբու Դաբիի ֆոնդային բորսայի ներկայացուցիչները շահագրգռվածություն են հայտնել Հայաստանի ֆինանսական շուկաների հնարավորությունների և հեռանկարների առնչությամբ:
Նախարարը կարևորել է Հայաստանի ֆոնդային բորսայի անդամակցումը Աբու Դաբիի «Թաբադուլ» բորսայական թվային հաբին՝ հույս հայտնելով, որ այն մեծապես կնպաստի միջազգային ներդրումային հնարավորությունների ընդլայնմանը՝ ապահովելով ռազմավարական հնարավորություններ դեպի նոր շուկաներ և ընդլայնելով հասանելիությունը ներդրումներին:
