ՀՀ ֆինանսների նախարարության պատվիրակությունը ՀՀ ֆինանսների նախարարի տեղակալ Արման Պողոսյանի գլխավորությամբ Վիեննայում մասնակցել է Համաշխարհային բանկի Ֆինանսական և կայունության հաշվետվողականության բարեփոխումների կենտրոնի (CFRR) և Ավստրիայի ֆինանսների նախարարության կողմից կազմակերպված «Ֆինանսական և կայունության հաշվետվողականության բարեփոխումներ. կողմնորոշվելով դեպի կանաչ և թվային օրակարգեր» խորագրով 2025 թվականի նախարարական համաժողովին:
Համաժողովի նպատակը Եվրոպայի և Կենտրոնական Ասիայի տարածաշրջանում միջազգային ստանդարտներին համահունչ ֆինանսական և կայունության հաշվետվողականության բարեփոխումների վերաբերյալ իրազեկվածության բարձրացումն ու քաղաքական աջակցության մոբիլիզացիան էր:
Համաժողովին ընդհանուր առմամբ մասնակցել են ավելի քան 250 բարձրաստիճան պատվիրակներ, այդ թվում՝ ֆինանսների նախարարներ, այլ պետական պաշտոնյաներ, զարգացման միջազգային գործընկերներ, հանրային և մասնավոր հատվածի, մասնագիտական և ակադեմիական համայնքների բարձր մակարդակի ներկայացուցիչներ, ինչպես նաև ԵՄ և միջազգային կառույցների փորձագետներ։
Համաժողովի շրջանակներում ՀՀ ֆինանսների նախարարի տեղակալ Արման Պողոսյանը մասնակցել է նախարարական պանելային քննարկմանը՝ ներկայացնելով ՀՀ-ում աուդիտի և հաշվապահական հաշվառման ոլորտներում իրականացված բարեփոխումները, խոսելով հանրային հատվածի ֆինանսական հաշվետվողականության թվայանացման գործընթացի, ինչպես նաև ոլորտներում առկա մարտահրավերների ու առաջիկա անելիքների մասին։
