Այսօր ՀՀ ֆինանսների նախարարության եկամուտների քաղաքականության և վարչարարության մեթոդաբանության վարչության պետ Օրի Ալավերդյանը մասնակցել է Հայաստանի հանրային ֆինանսների երկրորդ ուսումնասիրության վերաբերյալ Համաշխարհային բանկի կողմից կատարված զեկույցի շնորհանդեսին ու դրան հաջորդած պանելային քննարկմանը:
ՀԲ զեկույցը լրացնում է առաջին փուլի արդյունքները՝ վերլուծելով հարկային համակարգի արդյունավետությունը և առաջարկելով եղանակներ, որոնց միջոցով հարկաբյուջետային տարածքը կարող է մեծացվել՝ նպաստելով միաժամանակ և՛ Կառավարության հնգամյա ծրագրի իրականացմանը, և՛ արդյունավետ հարկային համակարգի պահպանմանը: Հիմնվելով առաջին փուլի ուսումնասիրությունների վրա՝ զեկույցում ընդլայնվել են մարդկային կապիտալի մասով վերլուծությունները՝ հատուկ կենտրոնանալով կրթության ոլորտում ծախսերի գնահատման վրա։
Պանելային քննարկման շրջանակներում մասնակիցներն անդրադարձել են հարկային համակարգի գործունակությանը, ինչպես նաև կրթության ոլորտում ծախսերի արդյունավետ ու նպատակային բաշխմանը:
Ֆինանսների նախարարությունը բարձր է գնահատում Համաշխարհային բանկի շարունակական աջակցությունն ու վերջինիս հետ համագործակցությունը՝ Հայաստանում հանրային ֆինանսների համակարգի բարեփոխումները խորացնելու և կայուն զարգացման նպատակները կյանքի կոչելու գործում:
