Սեպտեմբերի 6-ից 7-ը Մոսկվայում անցկացվում է «Ֆինանսներ զարգացման համար. կայուն և հավասարակշռված հարաբերությունների ձևավորման նոր հարթակ» խորագրով երրորդ ամենամյա ֆինանսական ֆորումը, որը կազմակերպել են Ռուսաստանի Դաշնության ֆինանսների նախարարությունը և Մոսկվայի կառավարությունը:
Ֆորումի մասնակիցներն են դաշնային և տարածաշրջանային իշխանությունների, պրոֆեսիոնալ, գիտական և գործարար համայնքների ներկայացուցիչներ, հասարակական կազմակերպություններ և ասոցիացիաներ, ինչպես նաև տնտեսագիտության և ֆինանսական ոլորտի միջազգային համբավ ունեցող փորձագետներ: ՀՀ ֆինանսների նախարարության մասնագետները ևս մասնակցում են ֆինանսական ֆորումին:
Մոսկվայի ֆինանսական ֆորումը ֆինանսական և տնտեսական քաղաքականությանն առնչվող հարցերի պրոֆեսիոնալ քննարկման հարթակ է, որը կարող է նպաստել միջնաժամկետ հեռանկարում այդ քաղաքականության առանցքային ուղղությունների սահմանմանը և տնտեսության զարգացման ռազմավարական նպատակներին հասնելու մեխանիզմների մշակմանը:
Համաժողովի շրջանակներում քննարկվում են պետության բյուջեին և հարկային քաղաքականությանը, բնակչության կենսամակարդակի բարելավման ուղիներին, միջպետական հարաբերությունների գերակայություններին, թվային տնտեսությունում պետական կառավարման վերափոխմանը, ինչպես նաև պետական վերահսկողության և պետական գնումների համակարգի զարգացմանն ուղղված հարցեր:
