ՀՀ ֆինանսների նախարար Տիգրան Խաչատրյանը օգոստոսի 19-ին ընդունել է Հայաստանի Հանրապետությունում Նիդերլանդների Թագավորության արտակարգ և լիազոր դեսպան պարոն Նիկոլաս Յակոբ Սխերմերսին:
Նախարար Տ. Խաչատրյանը դեսպանին տեղեկացրել է, որ Հայաստանի կառավարությունը հաստատել է 2021-2026թթ. գործունեության ծրագիրը, որում ձևակերպվել է, թե ինչպիսի տնտեսական ու ֆինանսական քաղաքականություն պետք է վարի կառավարությունը առաջիկա տարիների ընթացքում:
Այս տեսանկյունից, ըստ Տիգրան Խաչատրյանի, Նիդերլանդների Թագավորության հետ երկկողմ, ինչպես նաև՝ միջազգային կազմակերպություններում համագործակցությունն ունենալու է շատ կարևոր նշանակություն՝ նկատի ունենալով այն, որ Արժույթի միջազգային հիմնադրամում և Համաշխարհային բանկում Հայաստանը ներկայացված է Նիդերլանդների կողմից ղեկավարվող խմբում: Պարոն Խաչատրյանը շեշտել է, որ նշված միջազգային կազմակերպություններում Հայաստանին վերաբերող ծրագրի քննարկումներում հայկական կողմը մշտապես ունեցել է Նիդերլանդների կայուն աջակցությունը:
Տիգան Խաչատրյանը առանձնահատուկ ընդգծել է Հայաստանի և Նիդերլանդների Թագավորության ֆինանսների նախարարությունների միջև երկարամյա համագործակցությունը, հատկապես՝ հանրային ֆինանսների կառավարման ոլորտում փորձի փոխանակման կարևորությունը:
ՀՀ-ում Նիդերլանդների Թագավորության արտակարգ և լիազոր դեսպան պարոն Նիկոլաս Յակոբ Սխերմերսը հայերենով ողջունել է ՀՀ ֆինանսների նախարարին և շնորհավորել նրան այդ պաշտոնում նշանակվելու կապակցությամբ:
Պարոն դեսպանը բարձր է գնահատել Հայաստանի կառավարության հետ համագործակցային աշխատանքը և պատրաստակամություն է հայտնել խորացնել այն:
