Հուլիսի 16-ին ՀՀ ֆինանսների նախարար Ատոմ Ջանջուղազյանն ընդունել է Համաշխարհային բանկի Կառավարման գլոբալ գործառնական խմբի ավագ տնօրեն Դեբի Վեթսելի գլխավորած պատվիրակությանը:
Հանդիպման ընթացքում քննարկվել են Համաշխարհային բանկի հետ հանրային ֆինանսների կառավարման բնագավառում ընթացիկ ծրագրերը և շարունակական գործակցության ուղղությունները:
Ատոմ Ջանջուղազյանը բարձր է գնահատել հանրային ֆինանսների կառավարման ոլորտում ՀԲ-ի հետ համագործակցությունը և կարևորել վերջինիս ընդլայնման հեռանկարները:
Անդրադառնալով ոլորտում իրականացվող բարեփոխումներին՝ նախարար Ջանջուղազյանը նշել է, որ ներկայումս ՀՀ կառավարության համար առաջնահերթություն է թվայնացման գործընթացը, որը կնպաստի պետության գործունեության թափանցիկության ապահովմանը, կոռուպցիոն ռիսկերի նվազեցմանը, պետական մարմինների կողմից մատուցվող ծառայությունների հասանելիությանը և այլն:
Դեբի Վեթսելի խոսքով՝ ՀԲ-ն պատրաստակամ է աջակցել հանրային ֆինանսների կառավարման ոլորտում բարեփոխումների իրականացմանը՝ փորձի փոխանակման և հնարավոր այլ ձևաչափերով:
Կողմերը քննարկել են նաև պետական ֆինանսների կառավարման ռազմավարությունը, ինչպես նաև պետական կառավարման համակարգի արդիականացմանն ուղղված այլ հարցեր: