Ասիական զարգացման բանկի հերթական՝ 56-րդ տարեկան հանդիպման շրջանակներում շարունակվում են ՀՀ ՖՆ պատվիրակության հանդիպումները ԱԶԲ բարձրաստիճան պաշտոնատար անձանց հետ:
Ֆինանսների նախարար Վահե Հովհաննիսյանը և նախարարի տեղակալ Էդուարդ Հակոբյանը մայիսի 3-ին հանդիպում են ունեցել Հայաստանն ընդգրկող Ընկերակցային խմբի հետ։ Հանդիպման ընթացքում ԱԶԲ Գործադիր տնօրենի և վերջինիս թիմի կողմից ներկայացվել է Ընկերակցային խմբի երկրների 2022թ․ տարեկան հաշվետվությունը, ինչպես նաև քննարկվեցին խմբում ընդգրկված երկրների ընթացիկ տնտեսական իրավիճակն ու առաջիկա տարիների համար սահմանված առաջնահերթությունները։ ՀՀ ֆինանսների նախարարը հանդես է եկել առանձին ելույթով։
Միաժամանակ, նույն օրն առանձին հանդիպում է կայացել ԱԶԲ Կենտրոնական և Արևմտյան Ասիայի վարչության տնօրեն Եվգենի Ժուկովի թիմի հետ։ Հանդիպման ընթացքում հայկական կողմը ևս մեկ անգամ ընդգծել է ԱԶԲ ներգրավվածության կարևորությունը Հայաստանում իրականացվող ենթակառուցվածքային ծրագրերում։ Քննարկվել են նաև ընթացիկ համագործակցությունն էլ ավելի արդյունավետ դարձնելու հնարավորությունները, կարևորվել է ԱԶԲ կողմից փորձի փոխանակման և կարողությունների զարգացմանն ուղղված նախաձեռնությունները։
Անդրադարձ է կատարվել ԱԶԲ աջակցությամբ ՀՀ-ում իրականացվող ծրագրերի ընթացքին, դրանց ներքո հնարավոր ռիսկերին և վերջինիս նվազեցմանն ուղղված քայլերին, ապագա համագործակցության հեռանկարներին։
