2023 թվականի սեպտեմբերի 25-ին Հայաստանի Հանրապետությունը Տնտեսական համագործակցության և զարգացման կազմակերպության ավանդապահին ի պահ է հանձնել «Հարկման բազայի խեղաթյուրումը և շահույթների տեղափոխումը կանխելու նպատակով հարկային պայմանագրերին առնչվող միջոցառումների իրականացման վերաբերյալ բազմակողմ կոնվենցիայի» (այսուհետ՝ Կոնվենցիա) և վերջինիս անբաժանելի մաս կազմող վերապահումների ցանկի վավերագրերը: Կոնվենցիան ՀՀ Ազգային ժողովի կողմից վավերացվել էր դեռ 2022 թվականի սեպտեմբերին:
Կոնվենցիան Հայաստանի Հանրապետության համար ուժի մեջ է մտնելու 2024 թվականի հունվարի 1-ից:
Կոնվենցիայի https://www.oecd.org/tax/treaties/multilateral-convention-to-implement-tax-treaty-related-measures-to-prevent-BEPS.pdf և վերջինիս անբաժանելի մաս կազմող վերապահումների տեքստերը https://www.oecd.org/tax/treaties/beps-mli-position-armenia-instrument-deposit.pdf առկա են նշված հղումներով:
Կոնվենցիայի դրույթները փոփոխում են Կոնվենցիան ստորագրած պետությունների միջև կնքված՝ կրկնակի հարկումը բացառելու վերաբերյալ երկկողմ համաձայնագրի որոշ դրույթները: Այդ դրույթները, սակայն, փոփոխվում են այն դեպքում, երբ այդ երկու պետությունները Կոնվենցիայի վերապահումների փաստաթղթում Կոնվենցիայի նույն դրույթի կիրառության վերաբերյալ ընտրել են նույն մոտեցումը:
Հայաստանի Հանրապետության և այլ երկրների միջև կնքված՝ կրկնակի հարկումը բացառելու վերաբերյալ երկկողմ համաձայնագրերի դրույթների փոփոխության մասով Կոնվենցիայի դրույթների կիրառության վերաբերյալ տեղեկատվությունը՝ այսինքն երկկողմ համաձայնագրերի դրույթների փոփոխության վերաբերյալ Հայաստանի Հանրապետության և Կոնվենցիան ստորագրած այլ պետությունների ընտրության համընկնումների մասին տեղեկատվությունը, հասանելի է հետևյալ հղումով https://www.oecd.org/tax/treaties/mli-matching-database.htm:
