Նոյեմբերի 7-ին ՀՀ ԱԺ առողջապահության և սոցիալական հարցերի ու ֆինանսավարկային և բյուջետային հարցերի մշտական հանձնաժողովների, ինչպես նաև ՀՀ ԱԺ տարածքային կառավարման և տեղական ինքնակառավարման, գյուղատնտեսական և բնապահպանական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստերում շարունակվել են «Հայաստանի Հանրապետության 2019թ. պետական բյուջեի մասին» ՀՀ օրենքի նախագծի քննարկումները:
Ֆինանսների նախարարի պաշտոնակատար Ատոմ Ջանջուղազյանը ներկայացրել է 2019 թվականի պետական բյուջեի նախագծի ամփոփ նկարագիրը՝ ըստ ոլորտների:
ֆինանսների նախարարի պաշտոնակատարը նշել է, որ սոցիալական ապահովության ոլորտին 2019 թվականի պետական բյուջեի նախագծով նախատեսվում է հատկացնել 444,3 միլիարդ դրամ, որը նախորդ տարվա ցուցանիշը գերազանցում է 35,6 մլրդ դրամով։ ՀՀ առողջապահության ոլորտին կհատկացվի 91,7 մլրդ դրամ. 2018 թվականի համար նախատեսված ցուցանիշից ավելի է 8,6 մլրդ դրամով:
Ըստ Ատոմ Ջանջուղազյանի՝ 2019 թվականի բյուջեի նախագիծը կազմվել է գործող կարգավորումներին համապատասխան և անհրաժեշտության դեպքում կարող է վերանայվել, քանի որ ընթացքի մեջ են գտնվում նաև պետական կառավարման համակարգում կառուցվածքային փոփոխությունները:
Գյուղատնտեսության ոլորտում իրականացվող ծրագրերի համար նախատեսվում է 17,3 մլրդ դրամ, որից 5,8 մլրդ դրամը՝ արտաքին աջակցությամբ իրականացվող ծրագրերի միջոցով: Բնապահպանության ոլորտի համար նախատեսվում է 6,7 մլրդ դրամ, որտեղ առկա է արտաքին աջակցությամբ իրականացվող ծրագրերի 1.7 մլրդ դրամ մեծություն:
«ՀՀ 2019 թ. պետական բյուջեի մասին» ՀՀ օրենքի նախագծի քննարկումները կամփոփվեն մշտական հանձնաժողովներում, ԱԺ պատգամավորների եւ խմբակցությունների՝ նախագծի վերաբերյալ գրավոր առաջարկությունները կներկայացվեն ՀՀ ԱԺ աշխատակազմ:
