2022 թվականի ապրիլի 8-ին «Standard and Poor’s» վարկանիշային գործակալությունը վերահաստատել է Հայաստանի Հանրապետության՝ արտարժույթով և ազգային արժույթով երկարաժամկետ/կարճաժամկետ սուվերեն վարկավորման «B+»/«B» վարկանիշները՝ միևնույն ժամանակ հեռանկարը փոխելով «դրական»-ից դեպի «կայուն»:
Տարածաշրջանային և համաշխարհային ներկա անորոշությունների պայմաններում գործակալության կողմից Հայաստանին շնորհված վարկանիշներն անփոփոխ պահելը փաստում է ՀՀ կառավարության կողմից վարվող քաղաքականության ու հատկապես՝ մակրոտնտեսական քաղաքականության հուսալիության մասին:Մասնավորապես, գործակալության գնահատումներով վարկանիշի նույն մակարդակում պահպանման հիմքում ընկած են միջնաժամկետում առողջ և կայուն տնտեսական աճի հեռանկարները, որին նպաստում են ՀՀ կառավարության կառուցվածքային բարեփոխումները, ինչպես նաև՝ համեմատաբար ցածր կառավարության պարտքի բեռը, որը խարսխված է հարկաբյուջետային կայուն շրջանակով և ՀՀ կառավարության՝ պարտքի բեռի նվազեցման հանձնառությամբ:
«Կայուն» հեռանկարի անցման հիմքում ընկած են ռուս-ուկրաինական ռազմական գործողությունների արդյունքում Հայաստանի համար ի հայտ եկած տնտեսական մարտահրավերները, որոնք կարող են ռիսկեր ստեղծել մոտ ապագայում տնտեսության արդիականացման համար: Գործակալությունն առանձնացնում է նաև Ռուսաստանում պատժամիջոցների հետևանքով սպասվող կտրուկ տնտեսական անկումը, ինչն իր հետևանքները կունենա Հայաստանի տնտեսության վրա՝ հաշվի առնելով, որ Ռուսաստանը Հայաստանի խոշոր առևտրատնտեսական գործընկերն է:
Թեև գործակալությունն իջեցրել է ընթացիկ տարվա ՀՀ տնտեսական աճի կանխատեսումը և փոփոխել է հեռանկարը՝ դրականից կայուն, այդուհանդերձ նշվում է, որ առաջիկա տարիներին կարող է բարձրացվել վարկանիշը, եթե տնտեսության վերականգնման տեմպերն ավելի արագ լինեն և ուղեկցվեն կառուցվածքային բարեփոխումներով: Անդրադարձ է կատարվել նաև դրական ռիսկերին և հնարավորություններին, մասնավորապես՝ ռուսական ընկերությունների և ռուս քաղաքացիների՝ դեպի Հայաստան ներհոսքին, որը նույնպես կարող է դրական ազդեցություն ունենալ տնտեսության համար:
