Ֆինանսների նախարարի տեղակալ Ավագ Ավանեսյանի, ՖՆ գնումների քաղաքականության վարչության պետ Սերգեյ Շահնազարյանի և Միջազգային մասնավոր ձեռնարկատիրության կենտրոնի (CIPE) հայաստանյան մասնաճյուղի ղեկավար Լուիզա Այվազյանի մասնակցությամբ այսօր ամփոփվել են գնումների էլեկտրոնային համակարգի տեխնիկական առաջադրանքի նախագծի քննարկումները մասնավոր հատվածի ներկայացուցիչների հետ:
Ֆինանսների նախարարության ներկայացուցիչները խոսել են գնումների էլեկտրոնային նոր համակարգի առավելությունների, ընթացակարգերի թափանցիկության, գնման գնի հետ կապված ռիսկերի նվազման, օրենսդրությամբ սահմանված գին-որակ վերահսկողության և մի շարք տեխնիկական խնդիրներից ձերբազատվելու մասին:
Կարևորվել են գնման ընթացակարգերի թվայնացումը, գործիքակազմերի արդիականացումը և պայմանագրերի կառավարման գործընթացի բարելավումը:
Նախագծի շուրջ շահագրգիռ կողմերը բարձրացրել են իրենց հուզող հարցերը, ինչպես նաև հանդես եկել դիտարկումներով և առաջարկություններով:
