ՀՀ Ազգային ժողովն այսօր առաջին ընթերցմամբ քննարկել է «ՀՀ 2020 թ. պետական բյուջեի մասին» օրենքում փոփոխություններ և լրացում կատարելու մասին» օրինագիծը:
Նշենք, որ «Ռազմական դրության իրավական ռեժիմի մասին» օրենքի համաձայն՝ Կառավարությունը ռազմական դրություն հայտարարվելուց հետո՝ ոչ ուշ, քան 10-օրյա ժամկետում, ՀՀ Ազգային ժողով է ներկայացնում ընթացիկ տարվա պետական բյուջեում փոփոխություններ և լրացումներ կատարելու մասին օրենքի նախագիծ:
Փաստաթուղթը ներկայացնելիս ՀՀ ֆինանսների նախարար Ատոմ Ջանջուղազյանը մանրամասնել է, որ առաջարկվող նախագծով լրացուցիչ 40 մլրդ դրամի ծախսեր են ենթադրվում, հնարավորություն է ընձեռվում Կառավարությանը փոփոխություններ կատարել ծախսերի և պակասուրդի ֆինանսավորման հավելվածներում:
Նախագիծն ուղղված է ՀՀ զինված ուժերի և տնտեսության զորահավաքային ծավալման համար առավելագույն բարենպաստ պայմանների ստեղծմամբ Հայաստանի նկատմամբ զինված հարձակման անմիջական վտանգը կանխելու, մարդկանց կյանքի և անվտանգության պաշտպանությունը ռազմական դրության պայմաններում ապահովելու նպատակի ապահովմանը:
Նախագծով առաջարկվող կարգավորումները կտարածվեն 2020 թ. սեպտեմբերի 27-ից հետո ծագած հարաբերությունների վրա:
«ՀՀ 2020 թ. պետական բյուջեի մասին» օրենքում փոփոխություններ և լրացում կատարելու մասին» օրինագծի քննարկման ընթացքում այս փուլում պետք է լինի քննարկման ընդմիջում առնվազն 7 ժամով:
ԱԺ արտահերթ նիստի աշխատանքը կշարունակվի հոկտեմբերի 7-ին:
