Այսօր Ազգային ժողովում մշտական հանձնաժողովներում մեկնարկել են «ՀՀ 2020 թվականի պետական բյուջեի մասին» օրենքի նախագծի նախնական քննարկումները։ Ֆինանսների նախարար Ատոմ Ջանջուղազյանը պատգամավորներին ներկայացրել է բյուջետային ցուցանիշները, մակրոտնտեսական շրջանակը։ Այսպես, Հայաստանում 2020-ին բյուջեի նախագծով նախատեսվում է ունենալ 4.9 տոկոս տնտեսական աճի ցուցանիշ, ինչը, ըստ նախարարի, թույլ կտա ունենալ կառավարելի ռիսկեր: «Գնահատվում է, որ կարող է լինել ինչպես համեմատաբար ավելի ցածր ցուցանիշ, եթե արտաքին ազդակները լինեն բացասական, այնպես էլ բարձր: Այսինքն` տնտեսական աճը կարող է լինել նաև, օրինակ, 6-8 տոկոսի միջակայքում, սակայն ավելի քիչ հավանականությամբ, քան 4.9 տոկոսը»,-նշել է նախարարը։
«Ըստ էության 2019 թվականին սպասվող 1 տրլն 464 մլրդ դրամ հարկային եկամուտների փոխարեն 2020 թվականին ակնկալվում է որ կունենանք ավելի բարձր ցուցանիշ՝ 1 տրլն 602 մլրդ դրամ, որի արդյունքում հարկային եկամուտներ/ՀՆԱ հարաբերակցության ցուցանիշը կլինի 0.3 տոկոսային կետով ավելի: «Ընթացիկ ծախսերը ենթադրվում է, որ ՀՆԱ-ի մեջ մի փոքր կնվազեն այս տարվա սպասվող մեծության համեմատությամբ»,- ասել է պարոն Ջանջուղազյանը։ Սպասվում է, որ այս տարվա 21.7 տոկոս ընթացիկ ծախսեր/ՀՆԱ հարաբերակցության փոխարեն կլինի 21.5 տոկոս: Ենթադրվում է, որ 2020-ին կունենանք պակասուրդի 2.6 տոկոս ցուցանիշ:
