ՀՀ ֆինանսների նախարար Ատոմ Ջանջուղազյանը հունվարի 19-ին ընդունել է Գերմանիայի միջազգային համագործակցության ընկերության (GIZ) հայաստանյան գրասենյակի նորանշանակ ղեկավար տիկին Բարբարա Շվայգերին և այդ պաշտոնում իր գործունեությունն ավարտող տիկին Աննե Քեմփային:
Հանդիպման մեկնարկին ֆինանսների նախարարը շնորհավորել է տիկին Շվայգերին «GIZ»-ի գրասենյակի ղեկավարի պաշտոնը ստանձնելու կապակցությամբ՝ միաժամանակ շնորհակալություն հայտնել ներկայիս ղեկավար տիկին Քեմփային՝ նախորդ տարիների արդյունավետ համագործակցության համար:
Նախարարն ընդգծել է, որ ֆինանսների նախարարության և «GIZ»-ի միջև երկարատև համագործակցության ընթացքում հարուստ փորձ է կուտակվել և այդ համագործակցության արդյունքում նաև հայկական կողմին է փոխանցվել «GIZ»-ի գործունեության հաջողված մշակույթը:
Տիկին Քեմփան իր կողմից ընդգծել է ֆինանսական կայունության կարևոր դերը, նշելով, որ վերջին տարիներին «GIZ»-ի աջակցության շրջանակներում մեծ ուշադրություն է դարձվել ֆինանսական կառավարման արդյունավետության բարձրացմանը:
Կողմերը երկուստեք պատրաստակամություն են հայտնել հետագայում ևս արդյունավետ կերպով շարունակելու և զարգացնելու համագործակցությունը:
