ՀՀ ֆինանսների նախարարի տեղակալ Վահե Հովհաննիսյանը սեպտեմբերի 26-ից 30-ը Մանիլայում (Ֆիլիպինների Հանրապետություն) մասնակցել է Ասիական զարգացման բանկի (ԱԶԲ) Կառավարիչների խորհրդի 55-րդ տարեկան հանդիպմանը՝ որպես ԱԶԲ Կառավարիչների խորհրդում Հայաստանի Հանրապետության կառավարչին փոխարինող անձ (փոխկառավարիչ):
Տարեկան հանդիպման շրջանակներում կայացել են ԱԶԲ Կառավարիչների գործադիր նիստը և համատեղ հանդիպում Հայաստանն ընդգրկող երկրների խմբի հետ: Քննարկվել են համաշխարհային տնտեսական իրավիճակը և վերջին զարգացումները, ԱԶԲ քաղականությանն առնչվող օրակարգային հարցեր, այնուհետև մասնակից պետությունների ներկայացուցիչները հանդես են եկել առանձին ելույթներով (հայկական պատվիրակության ղեկավարի ելույթը հասանելի է հետևյալ հղմամբ)։
Առանձին հանդիպումներ են կայացել նաև ԱԶԲ նախագահի տեղակալ Աշոկ Լավասայի, Կենտրոնական և Արևմտյան Ասիայի վարչության տնօրեն Եվգենի Ժուկովի, Տնօրենների խորհրդում Հայաստանը ներկայացնող գործադիր տնօրեն Արիֆ Բահարուդինի և վերջինիս տեղակալ Քերըն Մյուրեի, ինչպես նաև ոլորտային վարչությունների ներկայացուցիչների հետ: Հանդիպումների ընթացքում քննարկվել են ԱԶԲ-ի հետ Հայաստանի Հանրապետության համագործակցության օրակարգային հարցերն ու գործընկերության հետագա խորացման հեռանկարները:
