ՀՀ ֆինանսների նախարարի տեղակալ Արմեն Հայրապետյանն ընդունել է Եվրոպական հանձնաժողովի Հարևանության և ընդլայնման բանակցությունների գլխավոր տնօրինության Հայաստանի, Ադրբեջանի, Բելառուսի և Արևելյան գործընկերության հարցերով բաժնի ղեկավար Վասիլիս Մարագոսի գլխավորած պատվիրակությանը:
Կողմերը, բարձր գնահատելով ՀՀ-ԵՄ առկա համագործակցությունը, անդրադարձել են ԵՄ աջակցությամբ Հայաստանում իրականացվող ծրագրերի ընթացքին: Քննարկվել են նաև ԵՄ բյուջետային աջակցության ծրագրերի, մասնավորապես՝ «Հայաստանում պետական ֆինանսների քաղաքականության բարեփոխումների ծրագրի» նախապայմանների կատարման ընթացքը:
Եվրոպական կողմը պատրաստակամություն է հայտնել շարունակել աջակցել տարբեր ոլորտներում ՀՀ-ի բարեփոխումների գործընթացներին՝ Հայաստանի համար հասանելի ԵՄ աջակցության գործիքների շրջանակներում:
