ՀՀ ֆինանսների նախարարության պատվիրակությունը՝ ՀՀ ֆինանսների նախարարի տեղակալ Արման Պողոսյանի գլխավորությամբ, մայիսի 9-ից 12-ը քաղաք Լոնդոնում մասնակցել է Անգլիայի և Ուելսի Երդվյալ Հաշվապահների Ինստիտուտի (ICAEW) կողմից կազմակերպված աուդիտորական ծառայությունների որակի հսկողության արտաքին գնահատման ընթացակարգերի գործնական կիրառման փորձի փոխանակման միջոցառումներին:
Միջոցառումների շրջանակներում հանդիպումներ են տեղի ունեցել Անգլիայի և Ուելսի Երդվյալ Հաշվապահների Ինստիտուտի (ICAEW) նախագահ Ջուլիա Պեննիի, Ֆինանսական Հաշվետվողականության Խորհրդի (FRC) Աուդիտի որակի հսկողության տնօրեն Էնթոնի Բարրետտի, ինչպես նաև Միացյալ Թագավորության կառավարության Բիզնեսի, էներգետիկայի և արդյունաբերական ռազմավարության դեպարտամենտի (Department for Business, Energy & Industrial Strategy) Ֆինանսական հաշվետվողականության և աուդիտի կարգավորման գծով ղեկավար Դեբբի Քրոշոուի հետ։
Հանդիպումների ընթացքում ներկայացվել են ՀՀ-ում աուդիտի որակի հսկողության ոլորտում առկա զարգացումները, ինչպես նաև քննարկվել են Միացյալ Թագավորության փորձի առանձնահատկությունները՝ ՀՀ-ում աուդիտի որակի հսկողության արդյունավետ համակարգ ձևավորելու համատեքստում։
