Դեկտեմբերի 17-ին ՀՀ ֆինանսների նախարարությունում տեղի է ունեցել սեմինար-քննարկում «Ֆիսկալ ռիսկերի կառավարում» խորագրով՝ պետական կառավարման և լիազոր այլ մարմինների ներկայացուցիչների մասնակցությամբ: Սեմինարը կազմակերպվել էր Ասիական Զարգացման Բանկի աջակցությամբ:
Քննարկման հիմնական շեշտադրումը ֆիսկալ ռիսկերի կառավարման գործառույթի բարելավման նպատակով պետական կառավարման և լիազոր այլ մարմինների հետ հետագա համագործակցության համար անհրաժեշտ նախադրյալների ստեղծումն էր:
Ֆինանսական վիճակագրության և ռիսկերի վարչության պետի տեղակալ Լորիս Մուրադյանը բացման խոսքում ընդգծել է ֆիսկալ ռիսկերի կառավարման կարևորությունը բյուջետային կանխատեսումների հուսալիության և հանրային ֆինանսների երկարաժամկետ կայունության բարելավման առումով: Նա շեշտել է, որ պետական ֆինանսների կառավարման համակարգի 2019-2023 թվականների բարեփոխումների ռազմավարության կարևոր բաղադրիչ է նաև ֆիսկալ ռիսկերի հաշվետվողականությունը: Անդրադարձ է եղել նաև ֆիսկալ ռիսկերի կառավարման համար պետական կառավարման և լիազոր այլ մարմինների հետ հետագա համագործակցության անհրաժեշտությանը:
Սեմինարի ընթացքում ԱԶԲ-ի ֆիսկալ ռիսկերի գծով փորձագետ Գրիգորիո Բելաունդեն հանգամանորեն ներկայացրել է ֆիսկալ ռիսկերի կառավարման ասպեկտները, այդ գործընթացում մասնակիցների դերի, համատեղ աշխատանքի և համագործակցության կարևորության անհրաժեշտությունը:
Հանդիպման ընթացքում ձեռք են բերվել պայմանավորվածություններ հետագա համագործակցության վերաբերյալ, մասնավորապես՝ տեղեկատվության ստացման, տվյալների հավաքագրման, հետագա ներքին աշխատանքային մեխանիզմների մշակման վերաբերյալ: