ՀՀ Ֆինանսների նախարարությունը մասնակցել է Career City Fest 2K23 | Special Edition աշխատաշուկային՝ ներկայացնելով Նախարարության՝ նոր երիտասարդ կադրեր ներգրավվելուն ուղղված քաղաքակնությունը: Միջոցառման շրջանակում Ֆինանսների նախարարության գլխավոր քարտուղար Կարեն Սարգսյանը պանելային քննարկմանն անդրադարձել է պետություն-մասնավոր երկխոսությանը, աշխատաշուկայի մարտահրավերներին ու հնարավորություններին, ինչպես նաև խոսել պետության՝ որպես գործատուի ներկայացվածության մասին։
«Պետությունն իր գերատեսչություններով միշտ էլ բաց է եղել բոլորի համար։ Դաշտը մրցակցային է, մասնավոր սեկտորում լավագույն աշխատակիցներին առաջարկներ անելու հնարավորությունները մեծ են, երևի թե դա է պատճառը, որ ժամանակի ընթացքում հիմնականում ուշադրություն է դարձվել մասնավոր ընկերություններին»,- նշել է Սարգսյանը։
Նրա խոսքով՝ պատճառը ոչ թե պետական համակարգում արտոնությունների բացակայությունն է, այլ այն, որ մասնավոր հատվածը ավելի նախաձեռնող ու առաջամարտիկ է այս առումով։
«Այժմ էլ ֆինանսների նախարարությունը մշակում է ռազամավարություններ, ծրագրեր, որոնք ուղղված են բրենդավորմանը, աշխատակիցների ներգրավվմանը և այլն»,- նշել է Կարեն Սարգսյանը։
