Գործադիրը հավանություն է տվել «ՀՀ 2019 թվականի պետական բյուջեի մասին» ՀՀ օրենքի նախագծի վերաբերյալ կառավարության օրենսդրական նախաձեռնությանը:
ՀՀ ֆինանսների նախարար Ատոմ Ջանջուղազյանը, ներկայացնելով նախագիծը կառավարության նիստի ժամանակ, նշել է, որ այն մշակվել է` հաշվի առնելով մի շարք նոր հանգամանքներ: Առաջինը հարկաբյուջետային կանոններն են, համաձայն որի պետք է իրականացվի այնպիսի հարկաբյուջետային քաղաքականություն, որը, մասնավորապես, կունենա պարտքը կայունացնող միտում: «Տրամաբանությունն այն է, որ մենք պետք է պարտք վերցնենք նոր հնարավորություններ գեներացնելու համար, այսինքն` որպես կանոն, կապիտալ ծախսերի համար, և մենք պարտք չենք վերցնելու ընթացիկ ծախսերի ֆինանսավորման համար», - ասել է ֆինանսների նախարարը:
Ըստ Ատոմ Ջանջուղազյանի` հաջորդ առանձնահատկությունն այն է, որ սկսած 2019 թվականից բյուջեն օրենքի մեջ ներկայացվելու է ծրագրային ձևաչափով:
Ատոմ Ջանջուղազյանը նաև ընդգծել է, որ արտաբյուջետային հաշիվների նախագծերը նախկինում հաստատել է կառավարությունը: Այժմ արտաբյուջետային հաշիվների նախագծումը դարձել է պետական բյուջեի նախագծի մաս, և նախատեսվում է, որ այն պետք է հաստատի Ազգային Ժողովը:
«Մակրոշրջանակը, որը ներկայացված է նախագծում, ըստ էության արտացոլված է 2019-2021թթ. ՄԺԾԾ-ում: Փոփոխություններ կան, մասնավորապես, արտաքին տնտեսական զարգացումների և ներքին զարգացումների գործոնների մասով», - նշել է նախարարը:
Ըստ Ատոմ Ջանջուղազյանի` 2018 թվականի տնտեսական աճը վերանայվել է, և ակնկալվում է, որ 4.5 տոկոսի փոխարեն այն կկազմի 6.5 տոկոս: 2019 թվականի համար տնտեսական աճի ցուցանիշը կանխատեսվում է 4.9 տոկոս:
Նախարարը նշել է, որ կապիտալ ծախսերը 2019 թվականին կավելանան 2018 թվականի համեմատությամբ: 2018-ին ակնկալվող ՀՆԱ-ի 2.3 տոկոսի փոխարեն 2019 թվականին այն կկազմի 3 տոկոս:
Եկամուտները կկազմեն մոտ 1 տրիլիոն 462 միլիոն դրամ (որից մոտ 1 տրիլիոն 396 միլիոն դրամը` հարկային եկամուտներ), որը թույլ կտա իրականացնել ծախսեր 1 տրիլիոն 614 միլիոն դրամի չափով: Բյուջեի դեֆիցիտը կկազմի ՀՆԱ-ի 2.2 տոկոսը կամ 151 տրիլիոն դրամ:
Ծախսերի կառուցվածքում հիմնական տեսակարար կշիռը բաժին է ընկնում սոցիալական և մշակութային ծախսերին` ընդհանուր ծախսերի մոտ 44 տոկոսը: Ակնկալվում է, որ ծախսերի մոտ 24 տոկոսը կօգտագործվի պաշտպանության, հասարակական կարգի և անվտանգության հարցերի համար, մոտ 12.3 տոկոսը` տնտեսության իրական հատվածի, մոտ 10 տոկոսը` պետական պարտքի սպասարկման համար: 3.2 տոկոսը կհատկացվի համայնքների բյուջեներին սուբսիդիաների ձևով: Պետական մարմինները կօգտագործեն պետական բյուջեի ծախսերի 5.8 տոկոսը:
«Այսպիսի հարկաբյուջետային քաղաքականության արդյունքում ակնկալվում է, որ կառավարության պարտքը կկայունանա 50 տոկոսի սահմաններում», - ընդգծել է ֆինանսների նախարար Ատոմ Ջանւուղազյանը: