Մարտի 6-ին ՀՀ ֆինանսների նախարար Վահե Հովհաննիսյանը հանդիպել է Հայաստանում Նիդերլանդների Թագավորության դեսպանատան գործերի ժամանակավոր հավատարմատար Յակոբ Ռայկերտ Թոդոր Ֆրեդերիքսի հետ:
Նախարար Հովհաննիսյանը նախ շնորհավորել է դեսպանին պաշտոնի ստանձնման կապակցությամբ, այնուհետև գոհունակություն հայտնել ՀՀ ֆինանսների նախարարության՝ հոլանդական կողմի հետ ունեցած բարձր մակարդակի համագործակցության վերաբերյալ, որը հատկապես ցայտուն կերպով դրսևորվում է Համաշխարհային Բանկի և Վերակառուցման և զարգացման եվրոպական բանկի ընկերակցային խմբերի շրջանակներում, որոնք առաջնորդում է հոլանդական կողմը՝ ներկայացնելով նաև ՀՀ-ն նշյալ կառույցների կառավարիչների խորհուրդներում: Կարևորվել է նաև երկու երկրների ֆինանսների նախարարությունների միջև ստորագրված փորձի փոխանակման և կարողությունների զարգացման վերաբերյալ Փոխըմբռնման հուշագրի շրջանակներում ընթացող համագործակցությունը:
Նախարարը բարձր է գնահատել հոլանդական կողմի առանձնահատուկ մոտեցումը՝ ուղղված Լեռնային Ղարաբաղից բռնի տեղահանված անձանց խնդիրների լուծմանն աջակցելուն, նաև ընդգծել է այդ ուղղությամբ կողմերի միջև համագործակցության շարունակականության կարևորությունը:
Հանդիպման ընթացքում կողմերն անդրադարձ են կատարել երկկողմ և բազմակողմ ձևաչափերով համագործակցության մի շարք այլ հարցերի, այդ թվում՝ Երևանում ս.թ. մայիսի 14-16-ը կայանալիք ՎԶԵԲ տարեկան հանդիպմանը: Հոլանդական կողմը պատրաստակամություն է հայտնել աջակցել գործընթացին անհրաժեշտության դեպքում: Նաև նախնական պայմանավորվածություն է ձեռք բերվել երկու երկրների ֆինանսների նախարարությունների միջև հանդիպում կազմակերպելու վերաբերյալ:
Կողմերը պայմանավորվել են շարունակել համատեղ ջանքերը ձեռք բերված պայմանավորվածությունների իրագործման ուղղությամբ: