ՀՀ ֆինանսների նախարարն ընդունել է Հայաստանում Լեհաստանի արտակարգ և լիազոր դեսպան Պավել Չեպլակին և Հայաստանի ֆոնդային բորսայի Դիտորդ խորհրդի անդամներ Մաթեուշ Զաիստովսկուն, Զդիսլավ Սոկալին, Փոմաս Սթիսին և Մայքլ Վոլտերին:
Հանդիպմանը մասնակցում էին նաև Հայաստանի ֆոնդային բորսայի կառավարման խորհրդի անդամ Գրեգոր Կուչարսկին և բորսայի գլխավոր տնօրեն Հայկ Եգանյանը:
Ողջունելով հյուրերին՝ նախարար Հովհաննիսյանն ընդգծել է ՀՀ ֆինանսների նախարարության և Հայաստանի ֆոնդային բորսայի համագործակցության բարձր մակարդակը:
Նախարարն անդրադարձ է կատարել իրականացվող ծրագրերին և կարևորել նոր նախաձեռնությունների կյանքի կոչման անհրաժեշտությունը:
Նախատեսվում է իրականացնել մասնավորապես գանձապետական պարտատոմսերի փոխանակման աճուրդային հարթակի ներդրում, ինչպես նաև մանրածախ վաճառքի gp.minfin.am էլեկտրոնային համակարգի կատարելագործում:
Երկուստեք կարևորվել է Հայաստանի ներքին պարտքի շուկայի զարգացմանը միտված ՀՀ ֆինանսների նախարարության և Հայաստանի ֆոնդային բորսայի փոխգործակցության ընդլայնումն ու խորացումը:
