31.01.2023
Ֆինանսների նախարարի տեղակալ Արման Պողոսյանը ԱԺ-ում մասնակցել է բանկային ոլորտի խնդիրների վերաբերյալ քննարկմանը
Հունվարի 30-ին ՀՀ ֆինանսների նախարարի տեղակալ Արման Պողոսյանը մասնակցել է ԱԺ տնտեսական հարցերի մշտական հանձնաժողովի նախագահ Բաբկեն Թունյանի գլխավորությամբ անցկացված քննարկմանը «ՀՀ հարկային օրենսգրքում փոփոխություններ և լրացումներ կատարելու մասին» և «ՀՀ քաղաքացիական օրենսգրքում փոփոխություններ կատարելու մասին» օրենքների նախագծի փաթեթի վերաբերյալ:
Քննարկմանը մասնակցել են նաև այլ ներկայացուցիչներ Կառավարությունից և Հայաստանում գործող բանկերից:
Ներկայացնելով օրենսդրական փաթեթով նախատեսվող փոփոխություններն ու լրացումները` Արման Պողոսյանը նշել է, որ առաջարկվում է անշարժ գույքի օտարման գործարքների ԱԱՀ և շահութահարկով հարկման բազաների նվազագույն կանոնների որոշմամբ` ընդհանուր մոտեցումից երկու դեպքերում բացառություն սահմանել բանկերի և վարկային կազմակերպությունների համար:
Քննարկման ընթացքում անդրադարձ է կատարվել անշարժ գույքի օտարման գործարքներին, առկա ռիսկերին և դրանց կառավարմանը:
Բանկային ոլորտում առաջացած մի շարք այլ խնդիրների քննարկման նպատակով պայմանավորվածություն է ձեռք բերվել առաջիկայում կազմակերպել ևս մեկ աշխատանքային քննարկում:
