Հունիսի 11-ին ՀՀ Ազգային ժողովի արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների համատեղ նիստում շարունակվել են «ՀՀ 2019թ. պետական բյուջեի կատարման մասին» տարեկան հաշվետվության քննարկումները։ Այսօր քննարկումների առանցքն է եղել ՀՀ արտաքին գործերի նախարարության, միջազգային կազմակերպություններին անդամակցելու վճարումների և սփյուռքի հարցերի գծով եկամուտների և ծախսերի կատարողականը:
Ինչպես նախորդ օրերին, այսօր ևս ՀՀ ֆինանսների նախարար Ատոմ Ջանջուղազյանը ներկայացրել է հաշվետու տարվա բյուջետային հատկացումների ընդհանուր ցուցանիշները:
Մասնավորապես, նա տեղեկացրել է, որ արտաքին գործերի նախարարության համար նախատեսված 16 մլրդ 648 մլն դրամի դիմաց փաստացի արձանագրվել է 16 մլրդ 435 մլն դրամի օգտագործում կամ շուրջ 99 տոկոս կատարողական:
Նախարարի խոսքով` ընդհանուր ծախսերում հիմնարար կշիռ ունեն օտարերկրյա պետություններում դիվանագիտական ծառայությունների մարմինների գործունեության կազմակերպմանն ու իրականացմանն առնչվող հատկացումները, որտեղ 10 մլրդ 760 մլն դրամի դիմաց արձանագրվել է 99.3 տոկոս կատարողական:
Անդամակցության գծով 2 մլրդ 550 մլն դրամ հատկացումն օգտագործվել է գրեթե 96 տոկոսով:
Նիստի հաջորդ հատվածում քննարկվել է եվրոպական ինտեգրման գծով եկամուտների և ծախսերի կատարողականը:
Ֆինանսների նախարար Ատոմ Ջանջուղազյանը, ներկայացնելով ֆինանսական ցուցանիշները, նշել է, որ դրամաշնորհային ծրագրերի համար փաստացի ստացվել է 8.6 մլրդ դրամ` ճշտված ծրագրի շուրջ 31 տոկոսը: Ոչ նպատակային կամ բյուջետային աջակցության դրամաշնորհների գումարը կազմել են 4 մլրդ 451 մլն դրամ: Եվրոպական ծագում ունեցող վարկային միջոցների հաշվին ճշտված ծրագիրը կազմել է շուրջ 20 մլրդ դրամ` արձանագրելով փաստացի 57 տոկոս ստացում:
