Այսօր ՀՀ ֆինանսների նախարար Վահե Հովհաննիսյանը և Հայաստանում Ճապոնիայի արտակարգ և լիազոր դեսպան Աոկի Յուտական ստորագրել են «Հայաստանի Հանրապետության և Ճապոնիայի միջև եկամուտների կրկնակի հարկումը բացառելու և հարկումից խուսափելն ու շրջանցելը կանխելու մասին» կոնվենցիա:
Կոնվենցիան հնարավորություն կտա խրախուսել ձեռնարկատիրական գործունեությունը երկու պետություններում` ստեղծելով նպաստավոր մրցակցային պայմաններ, ներդրումային բարենպաստ միջավայր և ներդրողների համար կայուն հարկային դաշտ:
Կոնվենցիայի ստորագրումը հնարավորություն կընձեռի զարգացնել Հայաստանի Հանրապետության և Ճապոնիայի միջև ապրանքների և ծառայությունների շրջանառությունը, կապիտալի, տեխնոլոգիաների, մարդկանց շարժը, ինչպես նաև կնպաստի տնտեսական կապերի զարգացմանը:
Հատկանշական է, որ 2023թ. իրադարձությունների հետևանքով, ընդունելով շուրջ 115,000 ԼՂ բռնի տեղահանված անձանց, Հայաստանը դարձել է Արտոնյալ ֆինանսավորման գլոբալ գործիքի հիմնադրամի (GCFF) շահառու: Սա հնարավորություն է տալիս ներգրավելու արտոնյալ ֆինանսավորում փախստականների խնդիրների լուծմանն ուղղված ծրագրերի համաֆինանսավորման համար:
Ֆինանսավորման ենթակա ծրագրերից ամենանշանակալին ԼՂ բռնի տեղահանված անձանց (և ոչ միայն) բնակարանային ապահովության ծրագիրն է: Ճապոնիայի կառավարությունն արդեն իսկ պաշտոնապես հայտարարել է Հայաստանի օգտին 10 մլն ԱՄՆ դոլար ներդրում կատարելու մասին:
