ՀՀ ֆինանսների նախարար Վահե Հովհաննիսյանը ԱՄՆ կատարած իր աշխատանքային այցի շրջանակներում հանդիպել է J.P.Morgan-ի հանրային հատվածի մասով փոխնախագահ Դանիել Զելիկովի հետ:
Հանդիպման շրջանակներում նախարարը Զելիկովին ներկայացրել է Հայաստանի ընդհանուր տնտեսական և քաղաքական իրավիճակը: Զելիկովը նշել է, որ տպավորված է ՀՀ կառավարության որոշ տնտեսական ցուցանիշներով՝ մասնավորապես պարտք/ՀՆԱ հարաբերակցության մակարդակով: ՀՀ սուվերեն վարկանիշի մասին խոսելիս նախարարը նշել է, որ դրա ցածր լինելու պատճառը հիմնականում փակ սահմաններն ու քաղաքական կոնֆլիկտն են։
Նախարարը ևս մեկ անգամ ընդգծել է, որ Հայաստանի առաջնային նպատակներից է դառնալ տարածաշրջանային ֆինանսական հանգույց, և այս առումով կարևոր է նաև կորեսպոնդենտային բանկային հարաբերությունների զարգացումը առաջատար բանկային ինստիտուտների հետ, ինչը կօգնի ընդլայնել ՀՀ բանկային համակարգի միջնորդական ծառայությունների արտահանման դիվերսիֆիկացիան:
Վահե Հովհաննիսյանը կարևորել է Հայաստանում J.P.Morgan-ի գրասենյակի բացման հնարավորությունը, և կողմերը պայմանավորվել են շարունակել երկխոսությունն այդ ուղղությամբ:
