ՀՀ ֆինանսների նախարարության ներկայացուցիչները նախարարի տեղակալ Ավագ Ավանեսյանի գլխավորությամբ մասնակցել են Ազգային փոխանցումային հաշիվների (NTA) վերլուծության արդյունքների վերաբերյալ քննարկմանը:
ՀՀ ֆինանսների նախարարությունը, ՄԱԿ-ի Բնակչության հիմնադրամի հայաստանյան գրասենյակը՝ «Ամերիա» խորհրդատվական կենտրոնի հետ միասին, միջազգային կազմակերպություններին և Հայաստանի Հանրապետությունում հավատարմագրված դիվանագիտական ներկայացուցչություններին ներկայացրեցին «Ազգային փոխանցումային հաշիվների» վերլուծության արդյունքները:
«Ազգային փոխանցումային հաշիվները» ժողովրդագրական փոփոխությունների և տնտեսության վրա դրա ազդեցության գնահատման առավել համապարփակ գործիք է հանդիսանում, որը համատեղում է Ազգային հաշիվների համակարգի ցուցանիշները ժողովրդագրական հիմնական ցուցանիշների հետ։ NTA-ը հնարավորություն է տալիս գնահատել բնակչության կառուցվածքի փոփոխությունների ազդեցությունը` տնտեսական քաղաքականություն մշակելու նպատակով, մասնավորապես, այն կիրառվում է հարկերի, պետական ֆինանսների, աշխատաշուկայի, կրթության և առողջապահության պետական ծախսերի արդյունավետությունը ժամանակի ընթացքում գնահատելու համար։
Հայաստանը արդեն մեկն է այն 27 երկրներից, որոնք իրականացրել են Ազգային փոխանցումային հաշիվների վերլուծություն: Նշված վերլուծությունը մեծապես նպաստել է նաև Ժողովրդագրական ռազմավարության մշակման գործընթացին և մեծ հետաքրքրության արժանացել միջազգային համայնքի շրջանակներում։
Հանդիպման ընթացքում ներկաներին ներկայացվեցին վերլուծության հիմնական ուղղությունները, հիմքում ընկած տվյալները և օգտագործված մեթոդաբանությունը, արդյունքների կիրառման հնարավոր քաղաքականության ուղղությունները, ինչպես նաև տրվեցին ներկաներին հետաքրքրող հարցերի պատասխաններ:
Զեկույցի մանրամասներին կարող եք ծանոթանալ՝ անցնելով կից հղմամբ՝ https://bit.ly/40Wz4rg:
