ՀՀ ֆինանսների նախարարության հաշվապահական հաշվառման և աուդիտորական գործունեության կարգավորման, հաշվետվությունների մշտադիտարկման վարչության պետ Կարեն Ալավերդյանը և ֆինանսական հաշվետվությունների մշտադիտարկման և աուդիտի կարգավորման բաժնի պետ Գոռ Քոչարյանը «Հաշվապահական հաշվառման և աուդիտորական գործունեության կարգավորման, հաշվետվությունների մշտադիտարկման վարչության հիմնական գործառույթները» թեմայով հանդիպում են անցկացրել ԵՊՀ տնտեսագիտության և կառավարման ֆակուլտետի ուսանողների հետ։
Բանախոսներն ուսանողներին ներկայացրել են ՀՀ ֆինանսների նախարարության, մասնավորապես՝ hաշվապահական հաշվառման և աուդիտորական գործունեության առանձնահատկությունները, մասնագիտական աճի ու կարիերայի հնարավորությունները:
Հանդիպման ընթացքում ՀՀ ֆինանսների նախարարության գլխավոր քարտուղար Կարեն Սարգսյանը, ողջունելով ուսանողներին, ընդգծել է, որ նախարարությունը կարևորում է ուսանողների և նոր մասնագետների ներգրավումը: Կարեն Սարգսյանը հույս է հայտնել ամրապնդելու գործակցային կապերը ԵՊՀ տնտեսագիտության և կառավարման ֆակուլտետի հետ և հետագայում ընդլայնելու համատեղ իրականացվող ծրագրերի շրջանակը:
ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը, անդրադառնալով ՀՀ ֆինանսների նախարարության հետ գործակցությանը, շեշտել է, որ այն ավելի է ամրապնդվել ԵՊՀ-ի և նախարարության միջև նախորդ տարի կնքված հուշագրի շնորհիվ, որը տարբեր ուղղություններով ակտիվորեն համագործակցելու հեռանկարներ է ստեղծել:
Հանդիպմանը ներկա են եղել ԵՊՀ տնտեսագիտության և կառավարման ֆակուլտետի «Ֆինանսներ» և «Կառավարում» կրթական ծրագրերի 3-րդ և 4-րդ կուրսերի ուսանողներ, ԵՊՀ պրոֆեսորադասախոսական կազմի և նախարարության ներկայացուցիչներ:
