ՀՀ ֆինանսների նախարարի տեղակալ Էդուարդ Հակոբյանի գլխավորած պատվիրակությունը հոկտեմբերի 11-ից 14-ը ք. Մարաքեշում (Մարոկկոյի Թագավորություն) մասնակցել է Արժույթի միջազգային հիմնադրամի (ԱՄՀ) և Համաշխարհային բանկի (ՀԲ) 2023թ. տարեկան հանդիպումներին:
Այցի ընթացքում ՀՀ ՖՆ պատվիրակությունը մասնակցել է ԱՄՀ և ՀԲ Կառավարիչների խորհուրդների պլենար նիստին ու Հայաստանն ընդգրկող Ընկերակցային խմբի հերթական հանդիպմանը: Ընկերակցային խմբի հանդիպման ընթացքում ՀԲ տնօրենների խորհրդում Հայաստանը ներկայացնող ԱՄՀ և ՀԲ գործադիր տնօրենները ներկայացրել են վերջին մեկ տարվա ընթացքում ընկերակցային խմբի կատարած աշխատանքները և հետագա պլանները, ինչպես նաեւ իրենց զորակցությունն են հայտնել Լեռնային Ղարաբաղից Հայաստանի Հանրապետություն բռնի տեղահանված բնակչությանը:
Միաժամանակ, առանձին հանդիպումներ են տեղի ունեցել ինչպես ԱՄՀ և ՀԲ, այնպես էլ միջազգային այլ գործընկերների՝ Ասիական զարգացման բանկի, Եվրոպական ներդրումային բանկի, Վերակառուցման և զարգացման եվրոպական բանկի բարձրաստիճան ներկայացուցիչների հետ: Քննարկվել են ՀՀ տնտեսական ներկայիս իրավիճակը, Լեռնային Ղարաբաղից բռնի տեղահանված անձանց աջակցության առաջնային կարիքներն ու միջնաժամկետ ծրագրերը, միջազգային զարգացման գործընկերների և օտարերկյա պետությունների կողմից այդ ուղղությամբ աջակցության գործիքներն ու դրանց կիրառման հնարավորությունները, ինչպես նաև վերջիններիս հետ ՀՀ ընթացիկ և առաջիկա ծրագրերը:
Այցի ընթացքում քննարկվել են երկկողմ համագործակցության նախաձեռնություններ Նիդերլանդների, Սլովենիայի և Վրաստանի ֆինանսների նախարարությունների պատվիրակությունների հետ:
Միջազգային վարկանշային գործակալությունների (Mood’s, Standard&Poors) բարձրաստիճան պաշտոնատար անձանց հետ հանդիպումների ընթացքում ներկայացվել են ՀՀ ընթացիկ տնտեսկան զարգացումները և դրանց հետագա միտումները, տարբեր մարտահրավերների դիմագրավման ուղղությամբ ՀՀ կառավարության ջանքերը:
«Citibank»-ի և «J.P. Morgan»-ի ներկայացուցիչների հետ հանդիպումներին անդրադարձ է կատարվել միջազգային շուկայում պարտատոմսերի թողարկման և հետգնման ուղղությամբ համագործակցությանը: