Օգոստոսի 8-ի նիստում ՀՀ կառավարությունը հավանության է արժանացրել «Հայաստանի Հանրապետության և Զարգացման ֆրանսիական գործակալության միջև թիվ CAM 1024 01 C վարկային համաձայնագիրը վավերացնելու մասին» Հայաստանի Հանրապետության օրենքի նախագիծը:
75 մլն եվրո ծավալով բյուջետային աջակցության միջոցներն ուղղվելու են «Հայաստանի Հանրապետության 2024 թվականի պետական բյուջեի մասին» ՀՀ օրենքով սահմանված պակասուրդի ֆինանսավորմանը:
Քաղաքականության վրա հիմնված բյուջետային աջակցության ծրագրի շրջանակը ներառում է բարեփոխումների հետևյալ ոլորտային ուղղությունները.
-
հարկաբյուջետային պլանավորման, թափանցիկության, ռիսկերի կառավարման, ինչպես նաև պետական ծախսերի արդյունավետության բարձրացումը,
-
պետական ներդրումների, այդ թվում՝ պետություն-մասնավոր գործընկերության համակարգի բարեփոխումները,
-
պետական գնումների համակարգի արդիականացումը,
-
կանաչ տնտեսության քաղաքականության մշակումը, կլիմայի փոփոխության հարմարվողականության բարձրացումն ու կանաչ ֆինանսական գործիքների կիրառության ընդլայնումը,
-
կառավարության պարտքի կառավարման համակարգի բարելավումը,
-
ֆինանսական և կապիտալի շուկաների զարգացումը,
-
կորպորատիվ թափանցիկության ընդլայնումը հաշվապահական հաշվառման և աուդիտորական գործունեության կարգավորման իրավական շրջանակի վերանայմամբ:
Սա ծրագրի 2-րդ փուլն է. «Ենթածրագիր 1»-ն իրագործվել է 2022թ.։ Ծրագրի իրականացումն ուղեկցվել է տեխնիկական աջակցությամբ, որն ուղղվել է ՀՀ ֆինանսների, էկոնոմիկայի, շրջակա միջավայրի նախարարություններում, ՀՀ կենտրոնական բանկում և ՀՀ պետական եկամուտների կոմիտեում նպատակային բարեփոխումների իրականացմանն աջակցելուն։
Ծրագիրն իրականացվում է Ասիական զարգացման բանկի հետ համատեղ, և բարեփոխումների շրջանակը ևս նույնական է, իսկ Ասիական զարգացման բանկի հետ վարկային համաձայնագիրը նախատեսվում է ստորագրել առաջիկայում՝ ԱԶԲ խորհրդի կողմից հաստատվելուց հետո:
